smokefree
Жирэмсэн үеийн тамхидалт
Тамхинаас амжилттайгаар гарах боломжийг тань нэмэгдүүлэх зүйлсийн талаар мэдэж авна уу.
Жирэмсэн үедээ тамхи татах нь доорх хүндрэлүүдийг үүсгэдэг. Үүнд:
- Зулбалт, умайн гадуурх жирэмслэлт: Үр тогтсон өндгөн эс умайн хананаас өөр газар бэхжихийг хэлэх бөгөөд энэ тохилдолд ихэвчлэн үр зулбадаг.
- Ихэс цагаасаа өмнө ховхрох: Ихэсээр дамжин хүчилтөрөгч болон шим тэжээл урагт очидог. Ихэс цагаасаа эрт ховхрох нь эх цус алдах шалтгаан болдгоос гадна хүүхдэд хүчилтөрөгч болон шим тэжээлээр дутагдах шалтгаан болж, ур зулбах эрсдэлтэй
- Ихэс түрүүлэлт: Ихэс түрүүлэлт гэдэг нь ихэс умайн хүзүүний орчимд болон умайн хүзүүний сувгийг таглаж хэвийн бус байрлалтай байхыг хэлдэг. Энэ нь жирэмсний үед болон төрж байхад цус ихээр алдах шалтгаан болдог.
- Жирэмсний хожуу үеийн хордлого: Жирэмсний сүүлийн 3 сард цусны даралт ихсэх, гар хөл хавагнахыг хэлнэ. Энэ нь ээж болон хүүхдэд аль альд нь хүндрэл учруулж болдог. Жишээ нь: эхэс цагаасаа өмнө ховхрох, хугацаанаасаа өмнө төрөх гэх мэт
- Хугацаанаасаа өмнө төрөх: Хугацаанаасаа өмнө төрсөн хүүхдэд амьсгалах, хоол боловсруулах, тархиндаа цус алдах гэх мэт асуудлууд үүсдэг. Мөн хүүхдийн өсөлт (хэлд орох, бодох сэтгэх, хөдөлгөөний чадвар) хоцрох болон сурлага муу байх магадлалтай байдаг байна
Эрүүл хүүхэдтэй болох
Хүүхдээ төрүүлхээсээ өмнө тамхинаас гарснаар таны хүүхдэд ач тустай. Жишээ нь:
- Хугацаанаасаа өмнө төрөх эрсдэл буурна
- Сэтэрхий уруул, тагнай гэх мэт төрөлхийн гажигтай төрөх эрсдэл буурна
- Эрүүл жинтэй хүүхэд төрж, эрүүл өсөж бойжих боломж нэмэгдэнэ
- Уушиг сайн хөгжих боломж нэмэгдэнэ
- Тархины хөгжил нь төрөхийн өмнө болон төрсний дараа хэвийн байна
- Нярайн гэнэтийн үхлийн хам шинжээр нас барах эрсдэл буурна
Төрсний дараа тамхи татахгүй тууштай байх
Хүүхэдтэй болсны дараа ч та тамхи татахгүй тууштай байж, хүүхдээ тамхинаас болон дам тамхидалтаас хамгаалах нь маш чухал. Нярай хүүхдүүд дам тамхидалтад өртөх нь эрүүл мэндэд нь асуудал үүсгэхээс гадна нярайн гэнэтийн үхлийн хам шинжээр нас барах эрсдэл өндөр байдаг.
Хүүхдийнхээ хажууд тамхи татахгүй байж, тамхигүй газарт цагийг өнгөрүүлж, гэр болон машинаа тамхигүй, эрүүл орчинтой болгож хүүхдээ дам тамхидалтаас хамгаалаарай. Нярай болон бага насны хүүхдүүд тамхигүй, эрүүл орчинд амьдрах нь тэдний эрүүл мэндэд ээлтэй байдаг ба доорх эрсдлүүдийг бууруулна. Үүнд:
- Нярайн гэнэтийн үхлийн хам шинжээр нас барах
- Ханиад хүрэх
- Бронхит, хатгаа тусах
- Чихний халдвар
- Багтраатай бол багтраа хүндрэх
- Томроод тамхи татдаг болох
Хөхөөр хооллолт ба тамхи таталт
Хөхөөр хооллох нь таны хүүхдэд олон талын ашиг тустай. Тамхи татдаг байсан ч хөхөөр хооллохоо зогсоож ер болохгүй.
Хөхөөр хооллолт танд болон таны хүүхдэд яагаад хэрэгтэй вэ?
- Хүүхэд эрүүл өсөж, бойжиход нэн чухал шим тэжээлээр хангаж, дархлааг сайжруулна.
- Чихний халдвар, суулгалт зэрэг өвчлөлөөс хамгаална
- Чихрийн шижин болон нярайн гэнэтийн үхлийн хам шинжийн эрсдэл буурна
- Таныг хөхний хавдар, өндгөвчний хавдар, сэтгэл гутрал болон чихрийн шижин өвчнөөр өвчлөх эрсдлийг багасгана
- Хүүхэдтэйгээ онцгой холбоо тогтооход тусална
- Төрсний дараа илүүдэл жингээ хаяхад тусална.
Хөхөөр хооллож байх хугацаанд тамхи татах үед никотин болон бусад хортой бодисууд хөхний сүүгээр дамжин хүүхдэд хортой нөлөөлнө. Хэрэв та тамхинаас гарахад хараахан бэлэн биш бол хүүхдээ тамхиар бага хордуулахыг зориорой. Ингэхийн тулд та:
- Хөхөөр хооллохоос өмнө бус дараа тамхи татах. Учир нь бие махбод хөхний сүүнээс никотиныг гадагшлуулахад удаан хугацаа шаардлагатай.
- Гэр болон машинаа тамхигүй орчин болгож хүүхдээ дам тамхидалтанд өртүүлэхгүй байх
- Өдөрт татдаг тамхины тоог багасгах
- Хүүхдээ хооллож байхдаа тамхи татахгүй байх. Учир нь хүүхэд тань тамхины утаагаар амьсгалахаас гадна, тамхи болон тамхины цогонд түлэгдэх эрсдэлтэй байдаг
1. Хоёр хүний төлөө тамхинаас гарах
Та жирэмсний аль ч хугацаанд тамхинаас гарсан танд болон таны хүүхдийн эрүүл мэндэд хэрэгтэй бөгөөд эрт гарах тусам ач тус ихтэй байдаг.
2. Тамхинаас бүр мөсөн гарах
Олон эмэгтэйчүүд жирэмсэхээр төлөвлөж байхдаа эсвэл жирэмсэн болмогц тамхинаас гардаг. Тэгэхдээ зарим нь хүүхдээ төрүүлээд эргэн тамхи татаж эхэлдэг байна. Тамхинаас гарснаар та хүүхдээ тамхины хороос хамгаалж байгаагаас гадна эрүүл амьдралыг бэлэглэж байгаа юм. Өөртөө итгэлтэй байж, тууштай байхад туслах тамхинаас гарах төлөвлөгөөг гаргаарай.
3. Эмчтэйгээ зөвлөлд
Хэрэв та жирэмслэхээр төлөвлөж байгаа болон жирэмсэн бол эмчтэйгээ тамхинаас гарах талаар зөвлөлдөөрэй. Эмчтэй танд тохирох, танд дэмжлэг болох аргуудын талаар ярилцаарай. Жишээ нь: мэргэшсэн хүнээс утсаар зөвөлгөө авах, цахим туслахд нэгдэх гэх мэт
4. Тамхинаас гарах явцад тулгарч болох хүндрэлүүдийг мэдэх
Таныг тамхи татахад хүргэдэг хүчин зүйлс, хорхойсол болон үгүйлэх хам шинжүүд тамхинаас гарах үед тулгардаг хамгийн том бэрхшээл. Тиймээс, хорхойсолыг даван туулахад дараах зөвөлгөөг өгье
- Тамхи татах хүслийг сэдээгч хүчин зүйлсээ мэдэх нь тэдгээрээс зайлсхийж тамхигүйгээр тууштай байхад тусална
- Хорхойссон үеээ даван туулах аргуудын жагсаалт гаргах
- Үгүйлэх хам шинж ихэвчлэн хэдэн өдрөөс хэдэн долоо хоног үргэлжилдэг. Дасгал хөдөлгөөн хийх төлөвлөгөө боловсруулах
5. Электрон тамхи
Электрон тамхийг жирэмсэн үед хэрэглэх нь маш муу. Никотинийг агуулдаг тул ээж болон хүүхдэд хоёуланд нь хортой байдаг ба никотин нь хүүхдийн тархи болон уушгийг гэмтээдэг. Түүнчлэн электрон тамхи нь хүүхдийн өсөлт, хөгжилд муугаар нөлөөлөх бусад хорт бодисыг агуулж байдаг (хүнд метал, хавдар үүсгэгч химийн бодисууд гэх мэт)
6. Дэмжлэг хүс
Та өөрийн болон хүүхдийнхээ төлөө тамхинаас бүр мөсөн татгалзахаар шийдсэн бол төлөвлөгөөгөө гэр бүл, найз нөхөддөө хэлээрэй. Жирэмсэн болон хүүхэдтэй ээжүүд ойр дотныхоо хүмүүсээс дэмжлэг авснаар тамхинаас илүү хүрдан, амжилттай гарч чаддаг.
- Таныг хэрхэн дэмжиж, туслах талаар тэдэнд хэлж өгөх нь чухал. Заримдаа таныг сонсох хүн хэрэгтэй байж болно эсвэл таны амжилтыг хамт тэмдэглэх хүн ч хэрэгтэй байж магадгүй шүү дээ
- Никотин үгүйлэх хам шинжээс болж таны ааш зан өөрчлөгдөж, уур уцаартай болж магадгүйг анхааруулж хэлээрэй. Ингэснээр таныг сэтгэл санаа тавгүй байх үед тэд танд тусалж, дэмжиж чадна
- Тамхи татдаг хүний хажууд байх нь тамхинаас гарахыг хэцүү болгодог тул гэрт болон машинд тамхи татахгүй гэсэн дүрмийг баримтлаарай
МЕССЕНЖЕР ЧАТАД СУУРИЛСАН ЦАХИМ ТУСЛАХ
ТАНД ХЭРЭГТЭЙ ХОЛБООСУУД
Хөтөлбөрийг санаачлан хэрэгжүүлэгч: ОНОМ САН
Хамтран ажиллагч байгууллага: Нийслэлийн эрүүл мэндийн газар, Наркологийн эмнэлэг
#SmokeFreeMongolia #OnomFoundation
Санал хүсэлтээ бидэнд илгээгээрэй.
2020 | Onom Foundation